Tuesday, 20 April, 2010

ప్రార్ధన

పసిపాపల చిరునవ్వులకు సంతసించు
నా మనసును మొద్దుబారనీయకు,
చిరుజల్లుకు హరివిల్లుకు ఉప్పొంగే
నా గుండెలోని ఆనందం ఆవిరవనీయకు,
సాటి మనిషివేదనకు చెమర్చు
నా కంటితడిని ఆరిపోనీయకు,
స్వామీ నా ప్రార్ధన మన్నించి
నాలోని మనిషిని మరణించనీయకు.

Sunday, 7 March, 2010

ఓ మహిళా నీకు వందనం!

తల్లివై మాకు జీవితాన్నిచ్చి ,
చెల్లివై మాకు ప్రేమను పంచి ,
నేస్తమై మాకు దారిని చూపి ,
భార్యవై మాకు వెలుగును పంచే ,

ఓ మహిళా నీకు వందనం !

Friday, 5 March, 2010

అమృత వర్షం

నులివెచ్చని సాయం సమయం లో
సంధ్య రాగం నీ తలపు,
నీకై వేచే నా మదిలో,
అమృత వర్షం నీ వలపు.

Thursday, 21 January, 2010

ఆశావాది

తెలతెలవారున తూరుపులో,
అరుణోదయాలు నాకోసం!
మబ్బులు వీడిన ఆకాశంలో,
వెన్నెల వెలుగులు నాకోసం!
వసంతమాసపు విరితోటల్లో,
కోకిల పాటలు నాకోసం!
'ఏరా,మామా'అను పిలుపుల్లో
స్నేహసుగంధం నాకోసం!

Monday, 16 February, 2009

జీవితం

జీవితమంటే ఆరాటం,
ఆశ నిరాశల పోరాటం!

Thursday, 4 December, 2008

చెలీ

అందమైన నా చెలీ
చక్కనైన జాబిలీ
నా హృదయం లోగిలి
నీకై తెరిచిన వాకిలి!

-శీతాకాలం, 2004.

Tuesday, 14 October, 2008

తోడు

క్షణమంటే బహుకాలం
అడుగంటే కడుదూరం
నీ తోడు లేకుంటే!